الأحد، 19 أبريل 2015

حبايب


حبايب

كلامنا .. أنا وإنت واحد .. ومتفقين
العمر .. خلاص بيتاخد .. وليه ساكتين

حبايب .. حبايب
ولسه بتفكر في إيه ؟
دايب .. دايب 
قولها ده اللي أنا نفسي فيه 

نفسي .. أعيش كل ثانية .. معاك
إخترتك ليا .. إخترت أعيش .. وياك

حبايب .. حبايب 
ولسه بتفكر في إيه ؟
دايب .. دايب 
قولها ده اللي أنا نفسي فيه

بتمنى .. أنا وإنت يجمعنا .. ياحبيبي بيت
وأستنى .. تجيني تقولها وأتهنى .. تقول حبيت

كتبت بتاريخ
9/4/2015

كلمات 
محمد الصعيدي 
&
نبيل ثابت

الأحد، 15 مارس 2015

محدش مات

محدش مات


محدش مات من الوحدة .. ولو واحدة راحت غيرها جاي أكيد
محدش مات من الفرقة .. ومش فارقة تكـوني معايا ولا بعـيد

أنا سايبك تيجي تروحي 
ولا أثرتي في روحي 
عايش مرتاح مفيش حاجة
ولا زودتي في جروحي 

أنا عارف فيه كام واحد
سابه حبيبه يتاخد
في ليل الأهة والوحدة
وعادي كمل وأنا شاهد

أنا فايت غرام قبلك
وجيت بالجرح وقابلتك
داويتي جراحي وجرحتي
خلص دورك ومات قلبك 

محدش مات عشان حد
سنين من العمر أهي بتتعد
لا هيزيد ساعة ولا هيقل
مكتوب من قبل خلق الأرض 

كتبت بتاريخ
25/5/2013



الثلاثاء، 27 يناير 2015

كل الحبايب

كل الحبايب 


كل الحبايب هنا .. ماشيين إيدين في إيدين
ولوحدي ماشي أنا .. وحبيبتي راحـت فين

فين إنتي ليه فايتاني 
مين غيري خد مكاني 
جاوبيني لو سامعاني 
وما تعمليش ناسياني 

كل الحبايب هنا .. شاهدين على اللي كــان 
بينك وبيني أنا .. فاكرة اللي كان زمـــان ؟

مين للغرام ينسى 
قلبه قوام يقسى
وأنا اللي أه لسه
بهواه ومش بنسى

كل الحبايب هنا .. سألوا نفس السـؤال 
ليه دايما كده .. الحب بينكوا محــــــال

محال هوانا يعيش 
نوعد وما نوفيش 
بتقولي ما تلومنيش 
ألومك .. ما تستاهليش

كتبت بتاريخ
25/3/2008

NaBiL THaBeT

الثلاثاء، 6 يناير 2015

أوهام

أوهــــــــــــــام


بقى بعد ما قلبي هواكي .. جاية تقوليلي أوهام
ده أنا كنت بعيش معاكي .. أحلى ليالي الغرام

ما خلفتش أي وعد .. وعدتك من البداية 
ماتسيبش إيدينا بعض .. وما قولتش النهاية 

إنتي اللي قولتي خلاص 
ودي قمة الإخلاص

أوهام .. حبنا بالنسبة ليكي كان أوهام
يا حرام .. جنيت عليكي بحبي أه يا حرام
يا سلام .. أخرتها كلمتين وسلام سلام 

بقى بعد الحب ده .. وحكاوي الناس علينا 
تبقى النهاية كده .. ضاع الحب بإيدينا 

فكرتي إزاي في البعد .. هتعيشي بعدي عادي 
وهيبقى مكاني حد .. وأنا هبقى ذكرى وماضي 

إنتي اللي قولتي خلاص 
ودي قمة الإخلاص 

أوهام .. حبنا بالنسبة ليكي كان أوهام
يا حرام .. جنيت عليكي بحبي أه يا حرام 
يا سلام .. أخرتها كلمتين وسلام سلام

كتبت بتاريخ 
8/5/2014

NaBiL THaBeT

السبت، 27 ديسمبر 2014

لولا الملامة



لولا الملامة أنا كنت جيت ع الباب دقيت ورميت جواب ومشيت يا حبيبي
هو الغرام يتنسى ده أنا ليل مسى مشغول وبقول هو حبيبي 

وأنا كان لي فين كل ده بالله يرضيك
أسهر ليالي وإنت نايمة عينيك 
ونهاري داير في كل الأماكن أدور عليك

لولا الملامة أنا كنت ألف بلاد وأزود في العناد وأشكي حالي 
يشهد عليك كل الناس إن إنت أساس ما جرالي 

وأنا كان لي فين كل ده بالله يرضيك
أسهر ليالي وإنت نايمة عينيك
ونهاري داير في كل الأماكن أدور عليك 

خـطــــــاط الغــــــــرام
NaBiL THaBeT

الخميس، 9 أكتوبر 2014

بتقولي

بتقولي



بتقولي واحدة اتنين تلاتة بحبهم
وأنا ليا كام قلب بس يحسهم
أوهام يا روحي مصدقاها أنا حبي قل

إزاي أسيبك أروح لغيرك معاها أعيش
وأنا كل حاجة فيا ليكي ما تعنديش 
طب خلي بالك انا بصراحة صبري مل

عاجبك كده يوم يومين بنحب بعض 
باقي الليالي بتحاربي فيا وطالبة بعد
وإن قولت ماشي هتكوني بعدي لأي حد
طب أنا ماشي وإنسيني وسيبيني مليت بجد

بتقولي صابرة سنين وساكتة تعبت ياما
بكتم ألامي وويل عذابي ورا إبتسامة
للدرجة دية أنا كنت قاسي وغدري سهل

طب ليه رضيتي تعيشي ويايا كده
علشان حبيبتي من برائتي متأكدة
ياريتنا ننهي الحالة دية إختاري حل

عاجبك كده يوم يومين بنحب بعض 
باقي الليالي بتحاربي فيا وطالبة بعد
وإن قولت ماشي هتكوني بعدي لأي حد
طب أنا ماشي وإنسيني وسيبيني مليت بجد

كتبت بتاريخ
11/8/2011

NaBiL THaBeT 

الجمعة، 19 سبتمبر 2014

من وقتها


أنا عشت معاك كتير
إحسبها كام سنة
كان مني كل خير 
وماخنتش يوم أنا
إنت اللي خنت .. 
وأنا اللي كنت 
بموت من وقتها 

كنت مستهون بحبي 
جيت في ثانية كسرت قلبي 
عشت لك قدام الناس 
وفضلت أداري عليك وأخبي 

أيوة مارضيتش أفضحك
والحاجة دي بتفرحك
بتقولي ولا تقدر في يوم 
 تستغنى عني لو أجرحك
أصلا إستغنيت أنا من وقتها 

كنت مستهون بحبي 
جيت في ثانية كسرت قلبي 
عشت لك قدام الناس
وفضلت أداري عليك وأخبي

أيوة ما ندمتش في يوم 
بس أنا دلوقتي بندم
وبقيت على نفسي بلوم
ويفيد بإيه إني أتندم
ما الندم عذاب بنام وأصحى عليه من وقتها

إنت مستهون بجرحي 
جرح ساكن حتى فرحي 
بضحك كده قدام الناس
من جوة بتعذب وببكي 
والبكا ما خاصمش عيني من وقتها 

كتبت بتاريخ
5/9/2014

ṆĂḆḭⱢ ṪḤĂḆΣṪ

الثلاثاء، 16 سبتمبر 2014

مشاعرنا واحدة



مشاعرنا واحدة .. ولا بتهدى
بنحب بعض ف كل يوم أشواقنا زايدة

بحب أشوف الكون جميل بعيونك إنتي
أحلى إبتسامة من شفايفك طمنتني
وماليش حبايب غير عيونك دول حبيبتي

إحساسنا واحد .. روحنا بتتاخد
 لو جه زعل بينا وكان فيه حد قاصد

بيغيروا منا الناس عشان قالوا مستحيل
نتلاقى بعد ما كان فراقنا مالوش بديل
مشاعرنا واحدة وكل شيء فيها جميل

بتخيلك قدامي .. وأكتب كلامي
 إنتي أجمل حب صادفني نورلي أيامي

أنا ما أمتلكش في الحياة دي غير المشاعر
كتبت فيكي كام قصيدة وإسمي شاعر
 قصة هوانا وصفتها في كل الخواطر

كتبت بتاريخ
29/8/2014

ṆĂḆḭⱢ ṪḤĂḆΣṪ


شكر خاص لصديقي الشاعر الغنائي محمد يحيى



الأربعاء، 27 أغسطس 2014

مشهد في المسرحية

مشهد في المسرحية


طالع بكام مشهد في المسرحية
شوفتك مكسور في الأول وصعبت عليا
جيت خدتك من حزنك وإديتك فرح
جيت إنت في تاني مشهد وإديتني جرح

طالع بكام مشهد .. ليه لعبت بيا
الناس أهي تشهد .. ع الحب والحنية
كانت زيف منك .. كانت تمثلية

طالع بكام مشهد .. في المسرحية
مظلوم وظالم .. حاجة مش عادية
مخلص وخاين .. هو فيه كده
طبعك أهو باين .. غريب الطبع ده

طالع بكام مشهد .. ليه لعبت بيا
الناس أهي تشهد .. ع الحب والحنية
كانت زيف منك .. كانت تمثلية

بجد مش عارف .. إزاي تتغير 
طبعك كده يعني .. والله يحيًر
في الأول طيب .. وبتوفي في حبك
في الأخر شرير .. وبيكدب قلبك

طالع بكام مشهد .. ليه لعبت بيا
الناس أهي تشهد .. ع الحب والحنية
كانت زيف منك .. كانت تمثلية

عجبتني القصة .. إنت اللي مألفها
تمثيلك عالي .. برافو بجد حابكها 
أستاذ بس سيب .. النهاية أنا أكتبها
وده أخر مشهد .. نزل ستار المسرحية

كتبت بتاريخ
26/8/2014

ṆĂḆḭⱢ ṪḤĂḆΣṪ


السبت، 23 أغسطس 2014

وأنا وياها

وأنا وياها 


وأنا وياها .. حاسس إني مالك دنيايا
أصل حياتي .. ما بتحلاش غير وأنا وياها
أبعد عنها .. ألقي الدنيا دي حاجة تانية
دنيا غريبة .. صعب أعيش فيها من غيرها 
ملكت عمري .. خطفت قلبي 
بقيت مش عايش .. إلا معاها 

بدعي أكون .. طول عمري معاها 
ولا تبعد .. ولا أبعد عنها 

وأنا وياها .. أطلب إيه تاني من الدنيا 
حلم حياتي .. بعد سنين وسنين إتحقق
بقى قدامي .. تملي معايا 
ولا ثانية .. بيبعد عن بالي 
كل ليالي .. الحيرة نسيتها 
فاكر بس .. ليالي هواها 

بدعي أكون .. طول عمري معاها 
ولا تبعد .. ولا أبعد عنها 

وأنا وياها .. أجمل أوقات عمري معاها 
نظرة عينها .. تخطف كل قلوب حواليها 
صوتها كلامها .. تنسي همومك مع ضحكتها 
هي حياتي .. وأنا في حياتها كل حياتها 

بدعي أكون .. طول عمري معاها 
ولا تبعد .. ولا أبعد عنها 

كتبت بتاريخ
30/11/2006

ṆĂḆḭⱢ ṪḤĂḆΣṪ

الأحد، 18 مايو 2014

زي النهارده



زي النهـــــــــــــــــــارده

زي النهارده من سنة .. سمعت صوت مليان دفا
كان صوت حبيبتي لما كانت أه حبيبتي وكل شيء

والنهارده سمعت صوت .. خلاني مش عايش بموت
ده صوت حبيبتي وحس تاني في الكلام جنبها


وبنتكلم وكأني لوحدي بتكلم .. مش لاقي جواب
وبنتالم ولا أنا لوحدي بتألم .. ده عذاب عذاب

زي النهارده من سنة .. اللهفة كانت في الكلام لهفة حبايب
وأدي النهارده كانت هنا .. شوقي سابقني وشوقها غايب

حاسس معاها ببرد حتى الورد لونو حزين
المكان نفس المكان .. لكن تحسو مكان غريب
حتى الحبيب ما بقاش حبيب


وبنتكلم وكأني لوحدي بتكلم .. مش لاقي جواب
وبنتالم ولا أنا لوحدي بتألم .. ده عذاب عذاب


كتبت بتاريخ

1/9/2010

ṆĂḆḭⱢ ṪḤĂḆΣṪ

الأربعاء، 14 مايو 2014

فاكر



فـــاكـــــــر

فاكر اول نظرة عين .. لما عينيا جت ف عينيها 
فاكر أول لمسة إيد .. لما إيديا لمست إيديها 
فاكر أول كلمة اتقالت .. أيوة بحبك ليا أنا قالت 
خلت قلبي في ثانية يميل .. غنى وقال يا عيني يا ليل 

أنا فاكر لسه لإني بعيشه معاها يوماتي 
نفس الحب بقاله سنين جُوًة حياتي 
عمالة بتزيد الأشواق مع دقاتي 
دقات قلبها ليا بتهمس إنت حياتي 

فاكر أول مرة خصام .. قعدت تشكي وأصالح فيها 
لما مشيت وقولت سلام .. ندهت ليا بحزن ماليها 
فاكر أنا بصيت ف عينيها .. لقيتها بتبكي رجعت ليها 
ما أقدرش عنها ف يوم أستغنى .. وليها بغني أجمل غنى

أنا فاكر لسه لإني بعيشه معاها يوماتي 
نفس الحب بقاله سنين جُوًة حياتي 
عمالة بتزيد الأشواق مع دقاتي 
دقات قلبها ليا بتهمس إنت حياتي 

كتبت بتاريخ
26/11/2013

ṆĂḆḭⱢ ṪḤĂḆΣṪ

الأربعاء، 30 أبريل 2014

بنحب نفارق

بنحب نفارق


بنحب نفارق ولا فارق .. في حياتنا مشاعر ولا فارق 
إن إحنا نحب 

ماشيين في طريق ما بيكملشي .. ماشيين علي شوك ما بننطقشي
كاتمين في قلوبنا ألام علشان ما نقولش الأه .. أأأأأأأأأأه

يا حبايبي وداع .. ويا أهلي وداع .. يا صحابي وداع
دول ناس بتروح
بقى شيء عادي وأه يا بعادي .. عن نفسي كمان ببعد عادي
ده فراق الروح

 ماشيين في طريق ما بيكملشي .. ماشيين علي شوك ما بننطقشي
كاتمين في قلوبنا ألام علشان ما نقولش الأه .. أأأأأأأأأأه

من أول يوم جيت فيه الدنيا .. وأنا شايف ناس بتفارق
ولا كان فارق بينهم عشرة .. وبتهون أحلي سنين
وده أول درس اتعلمته .. أنا وفهمته .. ودعت كتير
ما صعبش عليا حبيب فارق .. تاه في مفارق .. فيه غيره كتير

ماشيين في طريق ما بيكملشي .. ماشيين علي شوك ما بننطقشي
كاتمين في قلوبنا ألام علشان ما نقولش الأه .. أأأأأأأأأأه

كتبت بتاريخ
8/1/2010

ṆĂḆḭⱢ ṪḤĂḆΣṪ


الثلاثاء، 18 مارس 2014

خيبة أمل


خيبة أمل

تقدر تقول إن إحنا حالة مستعصية
شايفين حكاية حبنا معصية 
تعبنا روحنا بالذنوب
وعشان نكمل فيها ألف مشكلة 

كل الطرق قدام عينينا بقت سراب
وإزاي نكمل المسير وسط الضباب
جانا المصير نفترق .. يا دي العذاب

هو الفراق مكتوبنا دايما كل مرة 
أجمل حكايات الهوى نهايتها مرة
يعني الغرام خيبة أمل علي فكرة

تقدر تقول كام قلب عاشق نال مراده
ما نابوش يا عيني من الحب إلا ألامه
جرَحنا بإيدينا القلوب
وعشان تطيب محتاجة ألف طبيب يداوي

كل الحبايب قبل منا قالولنا نبعد
نصحونا ما سمعناش كلامهم لأ بنوعد
ما تسيب إيدينا حضن بعض .. وبنبعد

هو الفراق مكتوبنا دايما كل مرة
أجمل حكايات الهوى نهايتها مرة
يعني الغرام خيبة أمل علي فكرة 

كتبت بتاريخ
9/11/2012

NaBiL THaBeT

الاثنين، 3 مارس 2014

غير أي وقت فات

غير أي وقت فات

غير أي وقت فات 
شايفك أحلى .. عمالة بتحلى .. دنيتي وياكي
حاسس أنا بحاجات
شدًاني ليكي .. بتعلقني بيكي .. بيزيد هواكي

غلاوتك يوم .. عن يوم .. بتكبر
عيونك دول .. معقول .. بتسحر
والله الشوق .. زاد فوق .. ما أتصور

مش قادر أعيش .. من غير .. ما أشوفك قدامي 
أهرب على فين .. بنام .. تجيني في أحلامي
لو قولت كلام .. بيكون .. عنك كل كلامي

غلاوتك يوم .. عن يوم .. بتكبر
عيونك دول .. معقول .. بتسحر
والله الشوق .. زاد فوق .. ما أتصور

بتمنى يطول .. الوقت .. اللي فيه بشوفك
أسمع تنهيد .. بعديه .. بيبان كسوفك
وأنا مهما أقول .. إحساسي صعب أوصفهولك

غلاوتك يوم .. عن يوم .. بتكبر
عيونك دول .. معقول .. بتسحر
والله الشوق .. زاد فوق .. ما أتصور

كتبت بتاريخ 
28/11/2013

ṆĂḆḭⱢ ṪḤĂḆΣṪ

السبت، 22 فبراير 2014

أنا هو أنا

أنا هو أنا

أنا هو أنا .. مش حد تاني 
فات كام سنة .. ولسه في مكاني

الناس بتتغير .. ليه الكل بيدور
علي أي جرح .. فين الفرح .. مش موجود
وأنا ماشي ومكمل .. علي الشوك ومتحمل
هوصل أنا عارف .. وخيالي مش خايف .. مالوش حدود

وأنا هو أنا .. مش حد تاني 
فات كام سنة .. ولسه في مكاني

بحلم .. والحلم شيء مشروع 
فرحت ياما .. وياما بكيت دموع
بكتم ألامي وأقول لنفسي فترة وتعدي
تفوت أيامي وألقي ألامي تزيد وبتهدي
وأدي حياتي عايشها حلو ومــــــــر
مهما الهموم تتقل في يوم هتمــــــــر

وأنا هو أنا .. مش حد تاني 
فات كام سنة .. ولسه في مكاني

كتبت بتاريخ
20/5/2013

NaBiL THaBeT


الأحد، 25 أغسطس 2013

لحظة شوق


لحظة شوق

أنا من أول يوم وأنا عارف إنه كتير 
علي واحد زيك إني أحبه بدون تفكير
وأديني رجعت لعقلي وفوقت بقولك فوق

كان ليه بس يا قلبي بتعشق ناس بتخون
بعد العشرة وبعد الحب كده بتهون
والله خسارة فيهم منك لحظة شوق 

وأديني رجعت لعقلي وفوقت بقولك فوق
والله خسارة فيك مني لحظة شوق

أنا مش أسف أبدا عمري علي الإخلاص
طبعي وعايش بيه مع نفسي ويا الناس
مش حتغير ولا يوم أغدر ده مستحيل

لو عايشين في زمان فيه الطيبة بتتعيب 
عيبوا عليا وقلبي يداوي جراح ويطيب 
حكمة قالوها وبعمل بيها الصبر جميل 

وأديني رجعت لعقلي وفوقت بقولك فوق
والله خسارة فيك مني لحظة شوق

أنا من الأخر كده لو تسمع مني كلام
عايز أقولك إنت صغرت ولو قدام
جمعتنا الصدفة هتعرف إنت خسرت كتير 

صدقني مفيش أسرع في الدنيا من الأيام
هتلف تدور تايه متغرب ويا ألام
وساعتها هتندم قوي علي ذنبك أصله كبير

وأديني رجعت لعقلي وفوقت بقولك فوق
والله خسارة فيك مني لحظة شوق


كتبت بتاريخ
13/8/2013


NaBiL THaBeT

الخميس، 8 أغسطس 2013

عايشين



عايشين
عايشين .. وأدينا أهو ماشيين
والخطوة مكان ما تودي .. هتعدي السنين
عاشقين .. بقلوب صافية وراضين
بالقليل يبقي كتير .. مادام قريبين
وتفوت
دموعنا ع العيون .. نمسحها ومش بتكون
علامة لحزننا .. لأ فرحنا
وتموت
ذكرياتنا الحزينة .. ف حكايتنا الجميلة
مادام مع بعضنا .. إيه يهمنا
عايشين .. وساعات كتير بنضحك .. من كتر الألم
نصرخ .. نكتم ألامنا .. مفيش حد بيهتم
والصرخة صداها يرجع .. ويجيب لينا الأمل
بنكافح في الحياة .. بالجهد والعمل
وتفوت
دموعنا ع العيون .. نمسحها ومش بتكون
علامة لحزننا .. لأ فرحنا
وتموت
ذكرياتنا الحزينة .. ف حكايتنا الجميلة
مادام مع بعضنا .. إيه يهمنا
كلمات
محمد الصعيدينبيل ثابت
كتبت بتاريخ
26/11/2012


الخميس، 20 ديسمبر 2012

اتخيل


اتـخـيــل


اتخيل .. إن إيديك في إيديا
وفرحة حبك جوة عينيا 
إيه أجمل من كده يا حبيبي
حلوة الدنيا 

اتخيل .. لو ما كوناش اتقابلنا
كان الحزن هيبقي صاحبنا
إيه أصعب من كده يا حبيبي 
صعبة الدنيا 

حلوة الدنيا مادام مع بعض 
صعبة الدنيا كتير في البعد
بين قربك وبعادك عني 
مسافة وفرق السما من الأرض

اطمن .. قلبي لما ندهت عليه 
ده أنا قلبي روحك عايشة فيه 
كان ليه نتفارق يا حبيبي 
تعبت قلوبنا

مطمن .. طول ما انت معايا 
وهخاف من إيه ده انت منايا 
أتعب ألاقيك واقف جنبي 
ربي ما يبعدنا 

حلوة الدنيا مادام مع بعض 
صعبة الدنيا كتير في البعد
بين قربك وبعادك عني 
مسافة وفرق السما من الأرض

كتبت بتاريخ 
17/12/2012

NaBiL THaBeT

الأحد، 9 ديسمبر 2012

قولوا له

قولوا له


سألتوه عني وأنكر قال ما أعرفش
إسمي ولا فاكر ده بجد ما بيهزرش
طب كان بيكتب إيه في أول كل جواب
لأ كده يبقي بيكدب وأنا ليا معاه حساب 

وقولوا له اللي إنت نسيته نسيك
قطع صورك كل رسايلك
حتى كلامك في الجوابات
يعني خلاص بالنسبه له حبك مات

شاف مع غيرك حنية ما شافهاش وياك
حب حقيقي مش سيطرة ولا إمتلاك
وقولوا له وإنت ماشي سد الباب وراك

زيه زي غيره قدرته وما قدرش
لا الطيبة بتنفع والأسهل عنده بيغش
طب يعني جزائي إني أمنت لخاين 
ما هو من أول يوم ما عرفته أخره باين

وقولوا له اللي إنت نسيته نسيك
قطع صورك كل رسايلك
حتى كلامك في الجوابات
يعني خلاص بالنسبه له حبك مات

شاف مع غيرك حنية ما شافهاش وياك
حب حقيقي مش سيطرة ولا إمتلاك
وقولوا له وإنت ماشي سد الباب وراك

 
كتبت بتاريخ
4/12/2012

NaBiL THaBeT

 

إجمالي مرات مشاهدة الصفحة