الخميس، 23 يوليو 2009

سكة سفر



مسافر بعيد

مسافر بعيد ومش عارف .. 
راجع أنا ولا مش راجع ؟
مسافر لفين مش عارف .. 
هوصل أنا ولا هعيش تايه ؟

وسط الدروب قابلت ناس .. 
حلمهم كان حلمي لكن
بعد الرحيل في البعد عاشوا .. 
ولما فات العمر ماتوا .. وإتنسوا

وياخوفي من أخر الطريق .. 
حلمي يتوه وأرجع غريق
بعد أما أكون .. خلاص بقيت .. 
أنا في التراب

أدي اللي عيشت أبنيه خلاص .. ما بقاش يفيد
وأدي الحياة فارقتها روحي .. مسافر بعيد

وأدي اللي عيشت أحبهم .. أدي الصحاب 

شايلني فوق علي كتفهم .. في لحظة وداع

ودموع عيونهم .. جوه منهم .. حيرانين
إزاي يعدي العمر فجأة .. وينتهي 
والجاي موت

سكة سفر .. مالهاش رجوع 
طفوا الشموع .. وبلاش دموع
مفيش رجوع

ولا عادش تاني فيه لقا .. كلو اختفي
والبسمة راحت من الشفايف .. والكل عارف
إن السفر مكتوب .. إن الفراق مكتوب


لكن بننسي كل شيء .. حتي القدر
وبنفتكر أغلي الحبايب .. بالصور


تنزل دموع علي ناس كتير .. منهم أنا
لكن يومين .. شهرين .. سنة .. كلو اتنسى
واللي بيفضل مننا ذكري .. وبرضو بتتنسى

========

الشاعر الغنائي
نبيل ثابت
2009

الأكثر قراءة

مشاركة مميزة

روح الروح

ولما بقول وحشتيني  بقولها بقلبي وبعيني  وبتحسي اللي جوايا  غرامي ليكي وبيكبر  ولما بقول أنا بحبك  بحس النبض في قلبك تزيد دقاته واللهفة تبان ...