السبت، 27 ديسمبر 2014

لولا الملامة



لولا الملامة أنا كنت جيت ع الباب دقيت ورميت جواب ومشيت يا حبيبي
هو الغرام يتنسى ده أنا ليل مسى مشغول وبقول هو حبيبي 

وأنا كان لي فين كل ده بالله يرضيك
أسهر ليالي وإنت نايمة عينيك 
ونهاري داير في كل الأماكن أدور عليك

لولا الملامة أنا كنت ألف بلاد وأزود في العناد وأشكي حالي 
يشهد عليك كل الناس إن إنت أساس ما جرالي 

وأنا كان لي فين كل ده بالله يرضيك
أسهر ليالي وإنت نايمة عينيك
ونهاري داير في كل الأماكن أدور عليك 

خـطــــــاط الغــــــــرام
NaBiL THaBeT

الخميس، 9 أكتوبر 2014

بتقولي

بتقولي



بتقولي واحدة اتنين تلاتة بحبهم
وأنا ليا كام قلب بس يحسهم
أوهام يا روحي مصدقاها أنا حبي قل

إزاي أسيبك أروح لغيرك معاها أعيش
وأنا كل حاجة فيا ليكي ما تعنديش 
طب خلي بالك انا بصراحة صبري مل

عاجبك كده يوم يومين بنحب بعض 
باقي الليالي بتحاربي فيا وطالبة بعد
وإن قولت ماشي هتكوني بعدي لأي حد
طب أنا ماشي وإنسيني وسيبيني مليت بجد

بتقولي صابرة سنين وساكتة تعبت ياما
بكتم ألامي وويل عذابي ورا إبتسامة
للدرجة دية أنا كنت قاسي وغدري سهل

طب ليه رضيتي تعيشي ويايا كده
علشان حبيبتي من برائتي متأكدة
ياريتنا ننهي الحالة دية إختاري حل

عاجبك كده يوم يومين بنحب بعض 
باقي الليالي بتحاربي فيا وطالبة بعد
وإن قولت ماشي هتكوني بعدي لأي حد
طب أنا ماشي وإنسيني وسيبيني مليت بجد

كتبت بتاريخ
11/8/2011

NaBiL THaBeT 

الجمعة، 19 سبتمبر 2014

من وقتها


أنا عيشت معاك كتير
إحسبها كام سنة
كان مني كل خير 
وماخنتش يوم أنا
إنت اللي خنت  
وأنا اللي كنت 
بموت من وقتها 

كنت مستهون بحبي 
جيت في ثانية كسرت قلبي 
عيشت لك قدام الناس 
وفضلت أداري عليك وأخبي 

أيوة مارضيتش أفضحك
والحاجة دي بتفرحك
بتقولي ولا تقدر في يوم 
 تستغنى عني لو أجرحك
أصلا إستغنيت أنا من وقتها 

كنت مستهون بحبي 
جيت في ثانية كسرت قلبي 
عيشت لك قدام الناس
وفضلت أداري عليك وأخبي

أيوة ما ندمتش في يوم 
بس أنا دلوقتي بندم
وبقيت على نفسي بلوم
ويفيد بإيه إني أتندم
ما الندم عذاب بنام وأصحى عليه من وقتها

إنت مستهون بجرحي 
جرح ساكن حتى فرحي 
بضحك كده قدام الناس
من جوة بتعذب وببكي 
والبكا ما خاصمش عيني من وقتها 

كتبت بتاريخ
5/9/2014

ṆĂḆḭⱢ ṪḤĂḆΣṪ

الثلاثاء، 16 سبتمبر 2014

مشاعرنا واحدة



مشاعرنا واحدة .. ولا بتهدى
بنحب بعض ف كل يوم أشواقنا زايدة

بحب أشوف الكون جميل بعيونك إنتي
أحلى إبتسامة من شفايفك طمنتني
وماليش حبايب غير عيونك دول حبيبتي

إحساسنا واحد .. روحنا بتتاخد
 لو جه زعل بينا وكان فيه حد قاصد

بيغيروا منا الناس عشان قالوا مستحيل
نتلاقى بعد ما كان فراقنا مالوش بديل
مشاعرنا واحدة وكل شيء فيها جميل

بتخيلك قدامي .. وأكتب كلامي
 إنتي أجمل حب صادفني نورلي أيامي

أنا ما أمتلكش في الحياة دي غير المشاعر
كتبت فيكي كام قصيدة وإسمي شاعر
 قصة هوانا وصفتها في كل الخواطر

كتبت بتاريخ
29/8/2014

ṆĂḆḭⱢ ṪḤĂḆΣṪ


شكر خاص لصديقي الشاعر الغنائي محمد يحيى



الأربعاء، 27 أغسطس 2014

مشهد في المسرحية



طالع بكام مشهد في المسرحية ؟

طالع بكام مشهد في المسرحية ؟
شوفتك مكسور في الأول وصعبت عليا
جيت خدتك من حزنك وإديتك فرح
جيت إنت في تاني مشهد وإديتني جرح !

طالع بكام مشهد ليه لعبت بيا ؟
الناس أهي تشهد على الحنية
كانت زيف منك كانت تمثلية !

طالع بكام مشهد في المسرحية ؟
مظلوم وظالم حاجة مش عادية
مخلص وخاين هو فيه كده ؟!
طبعك أهو باين غريب الطبع ده

طالع بكام مشهد ليه لعبت بيا ؟
الناس أهي تشهد على الحنية
كانت زيف منك كانت تمثلية !

بجد مش عارف إزاي تتغير ؟
طبعك كده يعني والله يحيًر
في الأول طيب وبتوفي في حبك
في الأخر شرير وبيكدب قلبك

طالع بكام مشهد ليه لعبت بيا ؟
الناس أهي تشهد على الحنية
كانت زيف منك كانت تمثلية !

عجبتني القصة إنت اللي مألفها ؟
تمثيلك عالي برافو بجد حابكها 
أستاذ بس سيب النهاية أنا أكتبها
وده أخر مشهد نزّل ستار المسرحية

كتبت بتاريخ
26/8/2014

ṆĂḆḭⱢ ṪḤĂḆΣṪ


السبت، 23 أغسطس 2014

وأنا وياها

وأنا وياها 


وأنا وياها .. حاسس إني مالك دنيايا
أصل حياتي .. ما بتحلاش غير وأنا وياها
أبعد عنها .. ألقي الدنيا دي حاجة تانية
دنيا غريبة .. صعب أعيش فيها من غيرها 
ملكت عمري .. خطفت قلبي 
بقيت مش عايش .. إلا معاها 

بدعي أكون .. طول عمري معاها 
ولا تبعد .. ولا أبعد عنها 

وأنا وياها .. أطلب إيه تاني من الدنيا 
حلم حياتي .. بعد سنين وسنين إتحقق
بقى قدامي .. تملي معايا 
ولا ثانية .. بيبعد عن بالي 
كل ليالي .. الحيرة نسيتها 
فاكر بس .. ليالي هواها 

بدعي أكون .. طول عمري معاها 
ولا تبعد .. ولا أبعد عنها 

وأنا وياها .. أجمل أوقات عمري معاها 
نظرة عينها .. تخطف كل قلوب حواليها 
صوتها كلامها .. تنسي همومك مع ضحكتها 
هي حياتي .. وأنا في حياتها كل حياتها 

بدعي أكون .. طول عمري معاها 
ولا تبعد .. ولا أبعد عنها 

كتبت بتاريخ
30/11/2006

ṆĂḆḭⱢ ṪḤĂḆΣṪ

الأحد، 18 مايو 2014

زي النهارده



زي النهـــــــــــــــــــارده

زي النهارده من سنة .. سمعت صوت مليان دفا
كان صوت حبيبتي لما كانت أه حبيبتي وكل شيء

والنهارده سمعت صوت .. خلاني مش عايش بموت
ده صوت حبيبتي وحس تاني في الكلام جنبها


وبنتكلم وكأني لوحدي بتكلم .. مش لاقي جواب
وبنتالم ولا أنا لوحدي بتألم .. ده عذاب عذاب

زي النهارده من سنة .. اللهفة كانت في الكلام لهفة حبايب
وأدي النهارده كانت هنا .. شوقي سابقني وشوقها غايب

حاسس معاها ببرد حتى الورد لونو حزين
المكان نفس المكان .. لكن تحسو مكان غريب
حتى الحبيب ما بقاش حبيب


وبنتكلم وكأني لوحدي بتكلم .. مش لاقي جواب
وبنتالم ولا أنا لوحدي بتألم .. ده عذاب عذاب


كتبت بتاريخ

1/9/2010

ṆĂḆḭⱢ ṪḤĂḆΣṪ

الأربعاء، 14 مايو 2014

فاكر



فـــاكـــــــر

فاكر اول نظرة عين .. لما عينيا جت ف عينيها 
فاكر أول لمسة إيد .. لما إيديا لمست إيديها 
فاكر أول كلمة اتقالت .. أيوة بحبك ليا أنا قالت 
خلت قلبي في ثانية يميل .. غنى وقال يا عيني يا ليل 

أنا فاكر لسه لإني بعيشه معاها يوماتي 
نفس الحب بقاله سنين جُوًة حياتي 
عمالة بتزيد الأشواق مع دقاتي 
دقات قلبها ليا بتهمس إنت حياتي 

فاكر أول مرة خصام .. قعدت تشكي وأصالح فيها 
لما مشيت وقولت سلام .. ندهت ليا بحزن ماليها 
فاكر أنا بصيت ف عينيها .. لقيتها بتبكي رجعت ليها 
ما أقدرش عنها ف يوم أستغنى .. وليها بغني أجمل غنى

أنا فاكر لسه لإني بعيشه معاها يوماتي 
نفس الحب بقاله سنين جُوًة حياتي 
عمالة بتزيد الأشواق مع دقاتي 
دقات قلبها ليا بتهمس إنت حياتي 

كتبت بتاريخ
26/11/2013

ṆĂḆḭⱢ ṪḤĂḆΣṪ

الأربعاء، 30 أبريل 2014

بنحب نفارق


فراق
بنحب نفارق ولا فارق
في حياتنا مشاعر ولا فارق
إن إحنا نحب !

ماشيين في طريق ما بيكملش
ماشيين علي شوك ما بننطقش
كاتمين في قلوبنا ألام
علشان ما نقولش الأه

يا حبايبي وداع 
ويا أهلي وداع 
يا صحابي وداع
دول ناس بتروح

بقى شيء عادي
وأه يا بعادي 
عن نفسي كمان ببعد عادي
ده فراق الروح

ماشيين في طريق ما بيكملش
ماشيين علي شوك ما بننطقش
كاتمين في قلوبنا ألام
علشان ما نقولش الأه

من أول يوم جيت فيه الدنيا 
وأنا شايف ناس بتفارق
ولا كان فارق بينهم عشرة 
وبتهون أحلي سنين

وده أول درس اتعلمته 
أنا وفهمته 
ودعت كتير

ما صعبش عليا حبيب فارق 
تاه في مفارق 
فيه غيره كتير !!

ماشيين في طريق ما بيكملش
ماشيين علي شوك ما بننطقش
كاتمين في قلوبنا ألام
علشان ما نقولش الأه

كتبت بتاريخ
8/1/2010

ṆĂḆḭⱢ ṪḤĂḆΣṪ

الأربعاء، 19 مارس 2014

خيبة أمل

يعني الغرام خيبة أمل على فكرة


تقدر تقول إن إحنا حالة مستعصية
شايفين حكاية حبنا معصية 
تعبنا روحنا بالذنوب
وعشان نكمل فيها ألف مشكلة 

كل الطرق قدام عينينا بقت سراب
وإزاي نكمل المسير وسط الضباب
جانا المصير نفترق .. يا دي العذاب

هو الفراق مكتوبنا دايما كل مرة 
أجمل حكايات الهوى نهايتها مرة
يعني الغرام خيبة أمل علي فكرة

تقدر تقول كام قلب عاشق نال مراده
ما نابوش يا عيني من الحب إلا ألامه
جرَحنا بإيدينا القلوب
وعشان تطيب محتاجة ألف طبيب يداوي

كل الحبايب قبل منا قالولنا نبعد
نصحونا ما سمعناش كلامهم لأ بنوعد
ما تسيب إيدينا حضن بعض .. وبنبعد

هو الفراق مكتوبنا دايما كل مرة
أجمل حكايات الهوى نهايتها مرة
يعني الغرام خيبة أمل علي فكرة 

كتبت بتاريخ
9/11/2012

NaBiL THaBeT

الثلاثاء، 4 مارس 2014

غلاوتك



غير أي وقت فات 
شايفك أحلى .. عمالة بتحلى .. دنيتي وياكي
حاسس أنا بحاجات
شدًاني ليكي .. بتعلقني بيكي .. بيزيد هواكي

غلاوتك يوم .. عن يوم .. بتكبر
عيونك دول .. معقول .. بتسحر
والله الشوق .. زاد فوق .. ما أتصور

مش قادر أعيش .. من غير .. ما أشوفك قدامي 
أهرب على فين .. بنام .. تجيني في أحلامي
لو قولت كلام .. بيكون .. عنك كل كلامي

غلاوتك يوم .. عن يوم .. بتكبر
عيونك دول .. معقول .. بتسحر
والله الشوق .. زاد فوق .. ما أتصور

بتمنى يطول .. الوقت .. اللي فيه بشوفك
أسمع تنهيد .. بعديه .. بيبان كسوفك
وأنا مهما أقول .. إحساسي صعب أوصفهولك

غلاوتك يوم .. عن يوم .. بتكبر
عيونك دول .. معقول .. بتسحر
والله الشوق .. زاد فوق .. ما أتصور

كتبت بتاريخ 
28/11/2013

ṆĂḆḭⱢ ṪḤĂḆΣṪ

الأحد، 23 فبراير 2014

أنا هو أنا

أنا هو أنا

أنا هو أنا .. مش حد تاني 
فات كام سنة .. ولسه في مكاني

الناس بتتغير .. ليه الكل بيدور
ع الجرح .. فين الفرح .. مش موجود
وأنا ماشي ومكمل .. علي الشوك ومتحمل
هوصل أنا عارف .. وخيالي مش خايف  
مالوش حدود

وأنا هو أنا .. مش حد تاني 
فات كام سنة .. ولسه في مكاني

بحلم .. والحلم شيء مشروع 
فرحت ياما .. وياما بكيت دموع
بكتم ألامي وأقول لنفسي فترة وتعدي
تفوت أيامي وألقي ألامي تزيد وبتهدي
وأدي حياتي عايشها حلو ومــــــــر
مهما الهموم تتقل في يوم هتمــــــــر

وأنا هو أنا .. مش حد تاني 
فات كام سنة .. ولسه في مكاني

كتبت بتاريخ
20/5/2013

NaBiL THaBeT


الأكثر قراءة

مشاركة مميزة

روح الروح

ولما بقول وحشتيني  بقولها بقلبي وبعيني  وبتحسي اللي جوايا  غرامي ليكي وبيكبر  ولما بقول أنا بحبك  بحس النبض في قلبك تزيد دقاته واللهفة تبان ...