روح الروح

ولما بقول وحشتيني 

بقولها بقلبي وبعيني 

وبتحسي اللي جوايا 

غرامي ليكي وبيكبر 

ولما بقول أنا بحبك 

بحس النبض في قلبك

تزيد دقاته واللهفة

تبان بعد الغياب أكتر 

وحشتي قلبي وعينيا

وحشني لمسة لإيديا

وحشني كل ما فيكي

يا روح الروح

أنا مشتاق لمواعيدنا 

وأيام حلوة تجمعنا

أنا مشتاق أروح ليكي

يا روح الروح

ولما أسمع أنا صوتك

بتحلى الدنيا بوجودك

بحس براحة وأطمن

مادام إنتي حبيبتي بخير

ولما تقولي أنا بحبك

حبيبي بكرة أكون جنبك

بحس براحة وأطمن

بكون نفسي ليكي أطير

كتبت بتاريخ 

7/7/2019

NaBiL THaBeT

زيفتي معنى الحب

عيونك زي عيونها .. نفس لونها 

بتسحر أي حد

زايد جدا جمالها .. بيسّهل خداعها

بتخدع أي حد

وأنا منها إتسحرت .. في الآخر إتخدعت  

 

وبقيت أنا المجروح .. معايا وفين ما أروح

ذكرى منها وجرح

كرهت لون العيون .. وكرهت إني أكون 

عايش بستنى فرح

 

كلامك زي كلامها .. نفس صوتها

كان كله كدب

قولتي كل وعودها .. وأنا مصدقها

زيفتي معنى الحب

وأنا للأسف صدقت .. وتاني مرة إتخدعت

 

وبقيت أنا المجروح .. معايا وفين ما أروح

ذكرى منها وجرح

كرهت كل الكلام .. وكرهت حتى أنام

أصحى مستني فرح

 

بتعيدي أيامها .. بكل تفاصيلها

لأ ده إنتي كده قاصدة

تكوني صورة ليها .. وتفكريني بيها

حتى النهاية واحدة

 

كتبت بتاريخ

17/11/2015

 

NaBiL THaBeT   

حبايب

كلامنا أنا وإنت واحد .. ومتفقين

العمر خلاص بيتاخد .. وليه ساكتين

حبايب .. حبايب

ولسه بتفكر في إيه ؟

دايب .. دايب 

قولها ده اللي أنا نفسي فيه 

نفسي أعيش كل ثانية .. معاك

إخترتك ليا إخترت أعيش .. وياك

حبايب .. حبايب 

ولسه بتفكر في إيه ؟

دايب .. دايب 

قولها ده اللي أنا نفسي فيه

بتمنى 

أنا وإنت يجمعنا .. ياحبيبي بيت

وأستنى  

تجيلي تقولها وأتهنى .. تقول حبيت

كتبت بتاريخ

9/4/2015

كلمات 

محمد الصعيدي 

&

نبيل ثابت

محدش مات

محدش مات من الوحدة .. 

ولو واحدة راحت غيرها جاي أكيد

محدش مات من الفرقة .. 

ومش فارقة تكـوني معايا ولا بعـيد

أنا ســايبك تيجي تروحي 

ولا أثـرتـي في روحــــي 

عايش مرتاح مفيش حاجة

ولا زودتي في جروحــي 

أنا عارف فيه كام واحد

سابه حبيبه يتاخد

في ليل الأهة والوحدة

وعادي كمل وأنا شاهد

أنا فايت غرام قبلك

وجيت بالجرح وقابلتك

داويتي جراحي وجرحتي

خلص دورك ومات قلبك 

محدش مات عشان حد

سنين من العمر أهي بتتعد

لا هيزيد ساعة ولا هيقل

مكتوب من قبل خلق الأرض 

كتبت بتاريخ

25/5/2013

إسمع من هنا بصوتي 

NaBiL THaBeT

كل الحبايب

كل الحبايب هنا .. ماشيين إيدين في إيدين

ولوحدي ماشي أنا .. وحبيبتي راحـت فين

فين إنتي ليه فايتاني 

مين غيري خد مكاني 

جاوبيني لو سامعاني 

وما تعمليش ناسياني 

كل الحبايب هنا .. شاهدين على اللي كــان 

بينك وبيني أنا .. فاكرة اللي كان زمـــان ؟

مين للغرام ينسى 

قلبه قوام يقسى

وأنا اللي أه لسه

بهواه ومش بنسى

كل الحبايب هنا .. سألوا نفس السـؤال 

ليه دايما كده .. الحب بينكوا محــــــال

محال هوانا يعيش 

نوعد وما نوفيش 

بتقولي ما تلومنيش 

ألومك .. ما تستاهليش

كتبت بتاريخ

25/3/2008

NaBiL THaBeT

أوهام

بقى بعد ما قلبي هواكي .. جاية تقوليلي أوهام

ده أنا كنت بعيش معاكي .. أحلى ليالي الغرام

ما خلفتش أي وعد .. وعدتك من البداية 

ماتسيبش إيدينا بعض .. وما قولتش النهاية 

إنتي اللي قولتي خلاص 

ودي قمة الإخلاص

أوهام .. حبنا بالنسبة ليكي كان أوهام

 حرام .. جنيت عليكي بحبي أه يا حرام

 سلام .. أخرتها كلمتين وسلام سلام 

بقى بعد الحب ده .. وحكاوي الناس علينا 

تبقى النهاية كده .. ضاع الحب بإيدينا 

فكرتي إزاي في البعد .. هتعيشي بعدي عادي 

وهيبقى مكاني حد .. وأنا هبقى ذكرى وماضي 

إنتي اللي قولتي خلاص 

ودي قمة الإخلاص 

أوهام .. حبنا بالنسبة ليكي كان أوهام

 حرام .. جنيت عليكي بحبي أه يا حرام 

 سلام .. أخرتها كلمتين وسلام سلام

كتبت بتاريخ 

8/5/2014

NaBiL THaBeT

لولا الملامة

لولا الملامة أنا كنت جيت ع الباب دقيت ورميت جواب ومشيت يا حبيبي

هو الغرام يتنسى ده أنا ليل مسى مشغول وبقول هو حبيبي 

وأنا كان لي فين كل ده بالله يرضيك

أسهر ليالي وإنت نايمة عينيك 

ونهاري داير في كل الأماكن أدور عليك

لولا الملامة أنا كنت ألف بلاد وأزود في العناد وأشكي حالي 

يشهد عليك كل الناس إن إنت أساس ما جرالي 

وأنا كان لي فين كل ده بالله يرضيك

أسهر ليالي وإنت نايمة عينيك

ونهاري داير في كل الأماكن أدور عليك 

خـطــــــاط الغــــــــرام

NaBiL THaBeT

بتقولي

بتقولي

بتقولي واحدة اتنين تلاتة بحبهم

وأنا ليا كام قلب بس يحسهم

أوهام يا روحي مصدقاها أنا حبي قل

إزاي أسيبك أروح لغيرك معاها أعيش

وأنا كل حاجة فيا ليكي ما تعنديش 

طب خلي بالك انا بصراحة صبري مل

عاجبك كده يوم يومين بنحب بعض 

باقي الليالي بتحاربي فيا وطالبة بعد

وإن قولت ماشي هتكوني بعدي لأي حد

طب أنا ماشي وإنسيني وسيبيني مليت بجد

بتقولي صابرة سنين وساكتة تعبت ياما

بكتم ألامي وويل عذابي ورا إبتسامة

للدرجة دية أنا كنت قاسي وغدري سهل

طب ليه رضيتي تعيشي ويايا كده

علشان حبيبتي من برائتي متأكدة

ياريتنا ننهي الحالة دية إختاري حل

عاجبك كده يوم يومين بنحب بعض 

باقي الليالي بتحاربي فيا وطالبة بعد

وإن قولت ماشي هتكوني بعدي لأي حد

طب أنا ماشي وإنسيني وسيبيني مليت بجد

كتبت بتاريخ

11/8/2011

NaBiL THaBeT 

من وقتها

أنا عيشت معاك كتير

إحسبها كام سنة

كان مني كل خير 

وماخنتش يوم أنا

إنت اللي خنت  
وأنا اللي كنت 

بموت من وقتها 

كنت مستهون بحبي 

جيت في ثانية كسرت قلبي 

عيشت لك قدام الناس 

وفضلت أداري عليك وأخبي 

أيوة مارضيتش أفضحك

والحاجة دي بتفرحك

بتقولي ولا تقدر في يوم 
 تستغنى عني لو أجرحك

أصلا إستغنيت أنا من وقتها 

كنت مستهون بحبي 

جيت في ثانية كسرت قلبي 

عيشت لك قدام الناس

وفضلت أداري عليك وأخبي

أيوة ما ندمتش في يوم 

بس أنا دلوقتي بندم

وبقيت على نفسي بلوم

ويفيد بإيه إني أتندم

ما الندم عذاب بنام وأصحى عليه من وقتها

إنت مستهون بجرحي 

جرح ساكن حتى فرحي 

بضحك كده قدام الناس

من جوة بتعذب وببكي 

والبكا ما خاصمش عيني من وقتها 

كتبت بتاريخ

5/9/2014

ṆĂḆḭⱢ ṪḤĂḆΣṪ

مشاعرنا واحدة

مشاعرنا واحدة .. ولا بتهدى

بنحب بعض ف كل يوم أشواقنا زايدة

بحب أشوف الكون جميل بعيونك إنتي

أحلى إبتسامة من شفايفك طمنتني

وماليش حبايب غير عيونك دول حبيبتي

إحساسنا واحد .. روحنا بتتاخد

 لو جه زعل بينا وكان فيه حد قاصد

بيغيروا منا الناس عشان قالوا مستحيل

نتلاقى بعد ما كان فراقنا مالوش بديل

مشاعرنا واحدة وكل شيء فيها جميل

بتخيلك قدامي .. وأكتب كلامي

 إنتي أجمل حب صادفني نورلي أيامي

أنا ما أمتلكش في الحياة دي غير المشاعر

كتبت فيكي كام قصيدة وإسمي شاعر

 قصة هوانا وصفتها في كل الخواطر

كتبت بتاريخ

29/8/2014

ṆĂḆḭⱢ ṪḤĂḆΣṪ

شكر خاص لصديقي الشاعر الغنائي محمد يحيى