مصدومة فيك

أول كلامي معاك بحبك .. قولتها

مالقيتش منك رد قلبك .. صدها

كان أملي فيك .. إنك تدواي جراحي .. زادت

ومابين إيديك .. أجمل مشاعر فيا .. ماتت

مصدومة فيك 

في عز ما أنا محتاجة ليك 

سيبتني ومشيت 

وسيبت ظني يجرَح فيك

من جرح فيا 

أول كلامي معاك .. خايفة من حياتك

بيني وبينك ألف ميل .. والخطوة شوك

كان وعدك ليا تفضل معايا .. وخنت وعد

والليلة هي دي النهاية .. سيبنا بعض 

مصدومة فيك 

في عز ما أنا محتاجة ليك 

سيبتني ومشيت 

وسيبت ظني يجرَح فيك

من جرح فيا

كتبت بتاريخ

3/1/2010

NaBiL THaBeT 

إنتي الحياة

عيشت اللي عيشته 

من حياتي قبل منك

ياريته كان جوة حضنك

حضنك دفا .. حضنك أمان

قبلك ما حسيتش بحنان

جنبك بعيش أجمل حياة

إنتي الحياة

إنتي اللي عيشت أرسم صورتها في خيالي

وبقيتي ليا حقيقة واقفة بجد قدامي 

وده مش خيال .. أنا قلبي مال

وليكي قال .. بهواكي يا شمس الحياة

إنتي الحياة 

إنتي نور نوَر حياتي بعد ليـــــل 

إنتي الكلام كل الكلام فيكي قليل

إنتي اللي خليتي قلبي قوام يميل

وإني أسيبك من إيديا ده مستحيل

ده إنتي الحياة

كتبت بتاريخ

26/6/2019

NaBiL THaBeT 

عجزنا

عجزنا عجزنا

كبرت ملامحنا

وبانت التجاعيد

الشيب عمال يزيد

كإنه نار بتقيد

وتشوفني من بعيد

تديني كام سنة ؟!

صدقني مش بالعمر

العمر لسه صغير

ماشية السنين بتمر

ومعاها متحيَّر

من كتر دوق المر

شكلك كده اتغيَّر

كبرت قبل أوانك

عمر اتسرق منك

إديت للناس حنانك

أذوك ياما ف قلبك

خلاص راح زمانك

ومين فضل جنبك ؟!

لسه قادر تحب ؟

لسه قادر تكمل ؟

بتقولي عندك قلب ؟

وجراح بيتحمل ؟

صدقني كل ده كدب

إنت اللي بتجمل !!

شخبط على الأحلام

ولا شيء بيتحقق

بقيت خايف تنام

على طول كده مقلّق

كئيبة دي الأيام

راحت عليك صدّق

كتبت بتاريخ

8/7/2021

NaBiL THaBeT

فيها شيء مميز

فيها شيء مميز 

الحاجة جنبها تتميز

وجمالها .. زايد لأ مبهر

والنظرة .. النظرة بتسحر

وأنا كنت بدور ع العادي

وده كان قبل ما أشوفها قصادي

علت سقف طموحي وخلت

خلتني أحب الدنيا دي

اختلفت نظرتي للكون

وبقيت بعشق بجنون

بتمنى بتمنى يطول

عمري معاها

عملت إيه فيا 

ولا داري باللي حواليا 

بيها أنا مشغول

أنا بهواها 

فيها شيء خرافي 

رجعتلي العمر الدافي

هي نبع الحب صافي 

وجودها ف حياتي كافي

كتبت بتاريخ

21/7/2021

NaBiL THaBeT 

روح الروح

ولما بقول وحشتيني 

بقولها بقلبي وبعيني 

وبتحسي اللي جوايا 

غرامي ليكي وبيكبر 

ولما بقول أنا بحبك 

بحس النبض في قلبك

تزيد دقاته واللهفة

تبان بعد الغياب أكتر 

وحشتي قلبي وعينيا

وحشني لمسة لإيديا

وحشني كل ما فيكي

يا روح الروح

أنا مشتاق لمواعيدنا 

وأيام حلوة تجمعنا

أنا مشتاق أروح ليكي

يا روح الروح

ولما أسمع أنا صوتك

بتحلى الدنيا بوجودك

بحس براحة وأطمن

مادام إنتي حبيبتي بخير

ولما تقولي أنا بحبك

حبيبي بكرة أكون جنبك

بحس براحة وأطمن

بكون نفسي ليكي أطير

كتبت بتاريخ 

7/7/2019

NaBiL THaBeT

زيفتي معنى الحب

عيونك زي عيونها .. نفس لونها 

بتسحر أي حد

زايد جدا جمالها .. بيسّهل خداعها

بتخدع أي حد

وأنا منها إتسحرت .. في الآخر إتخدعت  

 

وبقيت أنا المجروح .. معايا وفين ما أروح

ذكرى منها وجرح

كرهت لون العيون .. وكرهت إني أكون 

عايش بستنى فرح

 

كلامك زي كلامها .. نفس صوتها

كان كله كدب

قولتي كل وعودها .. وأنا مصدقها

زيفتي معنى الحب

وأنا للأسف صدقت .. وتاني مرة إتخدعت

 

وبقيت أنا المجروح .. معايا وفين ما أروح

ذكرى منها وجرح

كرهت كل الكلام .. وكرهت حتى أنام

أصحى مستني فرح

 

بتعيدي أيامها .. بكل تفاصيلها

لأ ده إنتي كده قاصدة

تكوني صورة ليها .. وتفكريني بيها

حتى النهاية واحدة

 

كتبت بتاريخ

17/11/2015

 

NaBiL THaBeT   

حبايب

كلامنا أنا وإنت واحد .. ومتفقين

العمر خلاص بيتاخد .. وليه ساكتين

حبايب .. حبايب

ولسه بتفكر في إيه ؟

دايب .. دايب 

قولها ده اللي أنا نفسي فيه 

نفسي أعيش كل ثانية .. معاك

إخترتك ليا إخترت أعيش .. وياك

حبايب .. حبايب 

ولسه بتفكر في إيه ؟

دايب .. دايب 

قولها ده اللي أنا نفسي فيه

بتمنى 

أنا وإنت يجمعنا .. ياحبيبي بيت

وأستنى  

تجيلي تقولها وأتهنى .. تقول حبيت

كتبت بتاريخ

9/4/2015

كلمات 

محمد الصعيدي 

&

نبيل ثابت

محدش مات

محدش مات من الوحدة .. 

ولو واحدة راحت غيرها جاي أكيد

محدش مات من الفرقة .. 

ومش فارقة تكـوني معايا ولا بعـيد

أنا ســايبك تيجي تروحي 

ولا أثـرتـي في روحــــي 

عايش مرتاح مفيش حاجة

ولا زودتي في جروحــي 

أنا عارف فيه كام واحد

سابه حبيبه يتاخد

في ليل الأهة والوحدة

وعادي كمل وأنا شاهد

أنا فايت غرام قبلك

وجيت بالجرح وقابلتك

داويتي جراحي وجرحتي

خلص دورك ومات قلبك 

محدش مات عشان حد

سنين من العمر أهي بتتعد

لا هيزيد ساعة ولا هيقل

مكتوب من قبل خلق الأرض 

كتبت بتاريخ

25/5/2013

إسمع من هنا بصوتي 

NaBiL THaBeT

كل الحبايب

كل الحبايب هنا .. ماشيين إيدين في إيدين

ولوحدي ماشي أنا .. وحبيبتي راحـت فين

فين إنتي ليه فايتاني 

مين غيري خد مكاني 

جاوبيني لو سامعاني 

وما تعمليش ناسياني 

كل الحبايب هنا .. شاهدين على اللي كــان 

بينك وبيني أنا .. فاكرة اللي كان زمـــان ؟

مين للغرام ينسى 

قلبه قوام يقسى

وأنا اللي أه لسه

بهواه ومش بنسى

كل الحبايب هنا .. سألوا نفس السـؤال 

ليه دايما كده .. الحب بينكوا محــــــال

محال هوانا يعيش 

نوعد وما نوفيش 

بتقولي ما تلومنيش 

ألومك .. ما تستاهليش

كتبت بتاريخ

25/3/2008

NaBiL THaBeT

أوهام

بقى بعد ما قلبي هواكي .. جاية تقوليلي أوهام

ده أنا كنت بعيش معاكي .. أحلى ليالي الغرام

ما خلفتش أي وعد .. وعدتك من البداية 

ماتسيبش إيدينا بعض .. وما قولتش النهاية 

إنتي اللي قولتي خلاص 

ودي قمة الإخلاص

أوهام .. حبنا بالنسبة ليكي كان أوهام

 حرام .. جنيت عليكي بحبي أه يا حرام

 سلام .. أخرتها كلمتين وسلام سلام 

بقى بعد الحب ده .. وحكاوي الناس علينا 

تبقى النهاية كده .. ضاع الحب بإيدينا 

فكرتي إزاي في البعد .. هتعيشي بعدي عادي 

وهيبقى مكاني حد .. وأنا هبقى ذكرى وماضي 

إنتي اللي قولتي خلاص 

ودي قمة الإخلاص 

أوهام .. حبنا بالنسبة ليكي كان أوهام

 حرام .. جنيت عليكي بحبي أه يا حرام 

 سلام .. أخرتها كلمتين وسلام سلام

كتبت بتاريخ 

8/5/2014

NaBiL THaBeT