صورة في ذكرياتي

 

أهو كان حب وعدى وراح

بعديه بكام سنة قلبي إرتاح

أه تعب فترة وعاش في جراح

لكن بعد ما قابل حب جديد إرتاح

ونسيت كل الماضي

بقى شيء عادي 

ومابتهزش لو في يوم لقيتها قصادي

مشيت وكملت حياتي

وعيدت حساباتي

وبقت هي مجرد صورة في ذكرياتي

أهي دلوقتي في حضن تاني وأنا مع غيرها

ماشية الأيام وما وقفتش وكتر خيرها

عيشنا سنين مع بعض وكان البعد أخرها

يعني على رأي اللي قال خيرها في غيرها

ونسيت كل الماضي

بقى شيء عادي 

ومابتهزش لو في يوم لقيتها قصادي

مشيت وكملت حياتي

وعيدت حساباتي

وبقت هي مجرد صورة في ذكرياتي

أهو كان حلم ومنه صحينا

في سكة تاهت فيها خطاوينا

بعدنا وإخترنا الفراق بإيدينا

وكل واحد شاف بديل وإنتهينا

NaBiL THaBeT

تعلى الحالة

أنا أسف على كل مشاعري اللي إديتهالِك

وإنتي الحب بالنسبة لِك

مش أكتر من ماديات

على طول هات

عايزة اللبس كمان ماركات ؟!

ما بتخلصش الإحتياجات

تِعلى الحالة .. يزيد إحساسِك

بسمع أحلى كلام 

تِنزِل حبة .. لا بلقى محبة

ونكد بالأيام

أنا أسف على كل الحب اللي إديتهولِك

وماخدتش غير لَوية بُوزِك

ده إنتي عليكي أغرب بصّات

مش طبيعية إنتي بحالات

لأ وعليكي أعجب حركات

ولا رجالة بشنبات !!

تِعلى الحالة .. يزيد إحساسِك

بسمع أحلى كلام 

تِنزِل حبة .. لا بلقى محبة

ونكد بالأيام

أنا أسف على كل الشوق

أسف أنا علِّيتِك فوق

وإنتي مقامك أصلاً تحت

كنت أنا مَعمِي وفتَّحت

سيبتك من معاناتي خلصت

جنبِك عمري في يوم ما ارتحت

تِعلى الحالة .. يزيد إحساسِك

بسمع أحلى كلام 

تِنزِل حبة .. لا بلقى محبة

ونكد بالأيام

NaBiL THaBeT

حضن حبيبي

 

أكتر مكان .. فيه بحس أنا بالأمان

جوه حضن حبيبي

أنا من زمان .. لقيت فيه الحنان

لقيته في حضن حبيبي

محتاج لحضن حبيبي جنبي في محنتي

في ضعفي وهو جنبي بحس بقوتي

أنا في إشتياق لطلته ولمسته

واحشني صوته وإبتسامته وضحكته

أنا بعترف أنا كنت قاسي عليه

لكني فعلا في إحتياج ألمس إيديه

في كل مكان .. عيشنا فيه

شايل ذكريات

قاسي الزمان .. بعدنا ليه

وبسرعة الوقت فات

ليه إنتهى الحب ف ثواني قليلة

مالحقتش أشبع منه ليه مفيش لقا

كان كل يوم بينا معاد في الهوا

أجمل سنين الحب عيشناها سوا

لكن خسارة كل شيء فجأة إنتهى

وإفترقنا بقينا ذكرى بكرة تتنَسى

NaBiL THaBeT

لعنة

 

ليكي إيه ؟ ولا ليكي لزمة

سببتي في حياتي أزمة

خليكي مكانك لازمة

إوعي تيجي عندي تاني

أه بقيت كاره وجودِك 

عديتي كتير حدودِك

والدموع على خدودِك

إخدعي بيها حد تاني

لمّا هو البعد فارق

كنتي ليه بتقولي فارِق ؟!

إنتي فاكرة حبي لعبة ؟

إنتي حقيقي بجد لعنة !!

ليكي إيه ؟ ولا ليكي حاجة

كنتي ليا أكتر محتاجة

فاكرة طيبتي الزايدة سذاجة

وعادي اسامحك ؟ لا لا لا

ليكي إيه ؟ حبة مشاعر ؟

بيكي قلبي ماعدش شاعر

حبي ليكي وهم عابر

فوقت منه أرجعلك ؟ لا لا

NaBiL THaBeT

من أول يوم

 

من أول يوم أنا حبيتك ما أعرفش إزاي

أنا خدني الشوق وهويتك والفرح جاي

وكل يوم جديد حبك يزيد وأحبك أكتر

وده يبقى إيه اللي عملتيه بتشد أكتر

يوم ورا يوم بنام وبقوم على صوتك

تجيني في الأحلام ونقول كلام وسكوتك

حتى السكوت سحر لما تتكلم عيونك

إنتي دوبتيني ملكتيني خليتيني أحب الحياة تاني

إنتي جننتيني حيرتيني نسيتيني إسمي وعنواني 

من أول كلمة إتقالت منك أنا حنيت

وسيبت روحي تروح ليكي لحد البيت

دقيت ع الباب أنا قلبي داب وإستنيت

يجيني ردك ورد قلبك قال حبيت

وأوصفلك إيه أنا كنت إيه قبلك يا حبيبتي 

أنا كنت تايه في الدنيا وعايش ويا حيرتي 

وخلاص أنا مش هحتار تاني بعد أما حبيتك

إنتي دوبتيني ملكتيني خليتيني أحب الحياة تاني

إنتي جننتيني حيرتيني نسيتيني إسمي وعنواني 

NaBiL THaBeT

روحوا إسألوها

روحوا إسألوها ياترى  

مين اللي حبه قلبها ؟

وإستنوا منها ردها

بس الجواب عندي أنا 

أنا حبيبها وعشقها

قلبي اللي دوب قلبها

روحوا إسألوها عن السهر

وليالي غاب فيها القمر

كانت هي قمر السما

سهرانة ويايا أنا

أنا حبيبها وعشقها

قلبي اللي دوب قلبها

روحوا إسألوها حالها إيه ؟

بعد الغرام ما عاشت فيه

إيه اللي حاسة هي بيه ؟

هيمانة دايبة فيا أنا

أنا حبيبها وعشقها

قلبي اللي دوب قلبها

NaBiL THaBeT

كرهتك

 

كان قلبي معاك بيهواك

وعينيا شايفاك ملاك

غيرت ليه صورتك في عيني ؟

بقيت أتمنى لو ماكونتش حبيبي !

كرهتك أه كرهتك 

قد حبي ليك

بعدتك أه بعدتك 

عن حياتي وبيك

عرفت معنى القسية

على إيديك

وعدتك أه وعدتك 

طب وعدك ليا فين ؟

بتلومني تعالى لومني

لومني على السنين

اللي ضاعت من عمري

وأحلامي المنسيّين

NaBiL THaBeT

مفيش حاجة بينا

مفيش حاجة بينا تخليني

أسأل عليكي سامحيني

معاكي حق أنا من الأول

صدقت كدبك في عينيكي

وجريت ورا أوهام وخيال

وقال إيه قلبي الحنين قال

بحبك وإنتي قولتي محال

يبقى بينا فراق وأهو كان

أنا مش بعاتبك دلوقتي

أنا هقوى وإنتي اللي بدأتي

وإن كنتي ناسية اللي عملتيه

بعذابي ليكي هتفتكري

وبلاش تقولي كلام غرام ما بقاش يأثر

منك أنا إتعلمت ما بقيتش أنا صغير

راجع أنا بعد الفراق ومتغيّر

مش حبيبك بتاع زمان

وزماني مش هيكون ليكي

شايفاني راجع من تاني

وإنتي اللي محتاجة حناني

سامحيني مش هديكي أمان

وزماني مش هيكون ليكي

NaBiL THaBeT

قبل ماتودعني

قبل ماتودعني وتقول كلمتين
قبل ماتفارق وتمشي بدمعتين
رجعلي شوقي والمشاعر
لو لسه فاكر
رجعلي أحلى سنين

خدت مني كتير ماخدتش منك غير عذاب
ضيعت حب كبير وماشي روح من غير عتاب

قبل ما تترمي في حضن تاني
اتخيل نفسك لو كنت مكاني
ماكونتش ثانية تتحمل
اللي اتحملته وتكمل
كان صعب عليا أعيش وياك بأحزاني

خدت مني كتير ما خدتش منك غير عذاب
ضيعت حب كبير وماشي روح من غير عتاب

قبل ما تلوم عليا وعلى الزمان
قبل ما تحاسبني على كل اللي كان
إنت مش بتقدّر
حبي ليك كان أكبر
قدمت لك كل اللي في الإمكان

خدت مني كتير ما خدتش منك غير عذاب
ضيعت حب كبير وماشي روح من غير عتاب 

NaBiL THaBeT

رقة المشاعر

 

ياحبيبي الكلام .. كل الكلام .. شوية عليك

أحكيلك إيه .. أوصفلك بيه .. جمال عينيك

رقة المشاعر .. إنت بجد ساحر

عملت فيا إيه .. خليتني أتعلق بيك

يا حبيبي الأيام .. حلوة الأيام .. وإنت معايا

صحيت الشوق .. خليتني أدوق .. فرحي هنايا

رقة المشاعر .. إنت بجد ساحر

عملت فيا إيه .. خليتني أتعلق بيك

ياحبيبي تعالى .. عيش ويايا .. عمري بحاله

لو تعرف مالي .. إيه اللي جرالي  

حالي ماهوش حالي

هات عينيك في عينيا .. هات عينيك أسألها

إزاي سحرتني بنظرة .. كده من أول مرة

رقة المشاعر .. إنت بجد ساحر

عملت فيا إيه .. خليتني أتعلق بيك

NaBiL THaBeT